УСЛУГИ

УСЛУГА ЛИЧНА АСИСТЕНЦИЈА

Во април 2019 година, Црвен крст на Северна Македонија – Општинска организација Куманово започна со имплементација на социјалниот сервис „Лична асистенција на лица со попреченост“, како дел од програмата на Владата на Република Северна Македонија наменета за лицата со попреченост. Оваа програма е насочена кон обезбедување секојдневна лична асистенција и создавање услови за постигнување највисок можен степен на независност на лицата со попреченост во остварувањето на нивните интереси и потреби.
Поддршката се однесува на секојдневните активности и независното живеење, но опфаќа и аспекти поврзани со образование, работа и вработување, социјални релации, како и активно и инклузивно учество во заедницата.
Социјалниот сервис претставува организиран процес на обезбедување помош и поддршка од страна на сертифициран личен асистент, во согласност со индивидуалните потреби на корисникот. Услугата придонесува за зголемување на степенот на самостојност и овозможува рамноправно учество во општеството, во согласност со принципите на социјалниот модел и пристап кон попреченоста. Иако личната асистенција е директно насочена кон корисникот, нејзиниот позитивен ефект се чувствува и во рамки на семејството, придонесувајќи кон намалување на товарот на семејната грижа и подобрување на вкупниот квалитет на живот.
Право на користење на услугата имаат лица на возраст од 6 до 65 години, категоризирани како лица со потешка и најтешка телесна попреченост, како и лица со целосно оштетен вид. Општинската организација Куманово има ангажирано 20 лични асистенти кои обезбедуваат поддршка на 29 корисници на услугата. Услугата „Лична асистенција“ претставува значаен чекор кон унапредување на социјалната инклузија и почитување на човековите права, при што индивидуалниот пристап, професионалноста на асистентите и континуираната координација овозможуваат одржлив и квалитетен систем на поддршка во локалната заедница.

УСЛУГА- ПОМОШ И НЕГА ВО ДОМОТ

Зголемениот број жители над 65-годишна возраст во Општина Куманово, како и нивната недоволна вклученост во општествените процеси, ја нагласуваат потребата од воспоставување и континуирано унапредување на социјални услуги кои ќе обезбедат долгорочна грижа, заштита и поддршка.

Овие услуги имаат за цел да го подобрат квалитетот на животот и да овозможат поголема социјална вклученост на старите лица во заедницата, а истата во Куманово започна се спроведува од март 2024 година. Целта на услугата е зајакнување на функционалната способност на корисниците и овозможување тие да продолжат да живеат во сопствениот дом, водејќи што е можно понезависен и поквалитетен живот.

Услугата се реализира преку лиценцирани негуватели, кои обезбедуваат професионална, квалитетна и континуирана грижа согласно индивидуалните потреби и проценката на секој корисник. Преку индивидуален пристап и континуирана поддршка, услугата не само што ги задоволува основните животни потреби, туку значително придонесува и кон подобрување на менталното и емоционалното здравје на корисниците, охрабрувајќи ги да останат активни учесници во секојдневниот живот и во заедницата.

Во рамките на Општинска организација Куманово при Црвен крст на Република Северна Македонија ангажирани се вкупно 20 стручно обучени и лиценцирани негуватели кои активно ја испорачуваа услугата за 45 корисници. Реализацијата на услугата се одвива под координација на координатор на услугата, во соработка со социјален работник вработен во ЈУМ Центар за социјална работа Куманово, со што се обезбедува стручна поддршка, надзор и квалитет во спроведувањето на активностите.

Ваквиот организиран и професионален пристап овозможува навремено препознавање на потребите на корисниците, индивидуално планирање на услугата и обезбедување континуирана грижа во насока на унапредување на нивниот квалитет на живот.

< врати се назад